Ўзбекистон Республикаси Президентининг 2025 йил 26 декабрь куни Олий Мажлис ва Ўзбекистон халқига йўллаган Мурожаатномаси мамлакатимиз ижтимоий-иқтисодий ривожланишининг яқин келажакдаги устувор йўналишларини белгилаб берувчи тарихий ва дастурий ҳужжатга айланди.
Таъкидлаш жоизки, ушбу муҳим ҳужжатда камбағалликни қисқартириш, хотин-қизлар бандлигини таъминлаш, маҳалла тизими самарадорлигини ошириш ҳамда зўравонликка қарши муросасиз курашиш каби энг долзарб масалалар бўйича аниқ вазифалар қўйилди.
Давлат Раҳбари ўз нутқида камбағаллик муаммосига ёндашувни тубдан ўзгартириш зарурлигини алоҳида таъкидлаб ўтди. Айнан шу боис, эндиликда асосий эътибор моддий ёрдам кўрсатишга эмас, балки аҳолида даромад топиш кўникмаларини шакллантиришга қаратилмоқда. Таҳлилларга кўра, ижтимоий нафақа вақтинчалик мадад бўлса, эгалланган касб-ҳунар ва барқарор иш ўрни муаммони тизимли ҳал этишнинг ягона ва тўғри йўли ҳисобланади.
Шу ўринда, Мурожаатномада хотин-қизларнинг молиявий мустақиллигини таъминлаш энг долзарб вазифа сифатида белгиланганини алоҳида қайд этиш лозим. Қувонарлиси шундаки, бу мураккаб жараёнда бугун давлат тузилмалари билан бир қаторда нодавлат нотижорат ташкилотлари (ННТ) ҳам фаол ва самарали иштирок этмоқда.
“САБР” Республика ижтимоий-иқтисодий ривожланиш маркази ҳамкор ННТлар билан биргаликда қишлоқ ҳудудларида истиқомат қилувчи аёллар учун “рақамли иқтисодиёт асослари”, “электрон тижорат”, “микробизнес ва ўзини ўзи банд қилиш” йўналишларида замон талабларига мос янги ўқув модулларини жорий қилди. Натижада, тингловчилар нафақат назарий билим олди, балки реал даромад манбаига эга бўлишди.
Дарҳақиқат, бугунги кунда ижтимоий хизматлар ва бандлик масалалари бевосита маҳалла даражасида ҳал этиляпти. ННТлар “маҳалла еттилиги” билан яқин ҳамкорликда ишсиз ва ижтимоий ҳимояга муҳтож қатламни аниқлаб, уларни манзилли қўллаб-қувватлашга эришмоқда.
Хусусан, 2025 йилнинг ўзида “САБР” маркази томонидан 3 000 нафардан ортиқ хотин-қизлар ва ёшлар касб-ҳунарга ўқитилди. Уларнинг аксарияти ўз яшаш ҳудудида меҳнат фаолиятини бошлаб, ижтимоий дафтарлардан чиқарилиши таъминлангани ҳамкорликнинг яққол намунаси ҳисобланади.
Аёлларга нисбатан зўравонликка қарши курашиш масаласининг Давлат раҳбарининг бевосита назоратига олингани жамият ҳаётида катта аҳамиятга эга. Бу йўналишда жазо муқаррарлигини таъминлаш билан бирга, профилактика
ва реабилитация тизимига эътибор кучайтирилди. Ҳаётий тажриба шуни кўрсатадики, аёлнинг иқтисодий жиҳатдан мустақил бўлиши зўравонлик ҳолатларининг олдини олишда энг муҳим ҳимоя ҳисобланади.
Мухтасар қилиб айтганда, давлат, маҳалла ва фуқаролик жамияти институтларининг ўзаро ҳамкорлиги — белгиланган юксак ижтимоий-иқтисодий мақсадларга эришишнинг энг самарали механизмидир.
Президентимиз таъкидлаганидек, кучли фуқаролик жамияти — ислоҳотларнинг ишончли кафолатидир. Ишончимиз комилки, бугунги саъй-ҳаракатларимиз инсон қадрини улуғлаш, хотин-қизларимиз учун хавфсиз ҳамда барқарор ҳаёт яратишга хизмат қилади.
Мавлюдахон ШИРИНОВА,
“САБР” Республика ижтимоий-иқтисодий ривожланиш маркази директори